மத சுதந்திரம் பற்றிய அமெரிக்காவின் 8 பக்க அறிக்கைக்கு, மத்திய அரசும், புதிய வெளியுறவுத்துறை அமைச்சர் ஜெய்சங்கரும் நறுக்குத் தெறித்தார்போல் பதில் சொல்லியுள்ளனர். ‘‘எங்கள் நாட்டின் மத சுதந்திரம் குறித்து, எந்த ஒரு வெளிநாட்டு அரசு மற்றும் வெளிநாட்டு நிறுவனங்களிடம் இருந்து நற் சான்றிதழ் பெறும் நிலையில், நாங்கள் இல்லை. இது எங்கள் நாட்டின் உள் விவகாரம், இதில் தலையிட அமெரிக்காவுக்கு அதிகாரம் இல்லை’’ என்று அமெரிக்காவை இடித்து கூறியுள்ளார்.

இதுகுறித்து நமது வெளியுறவுத்துறை அமைச்சக செய்தித் தொடர்பாளர் ராவேஷ் குமார் பேசும்போது, ‘‘எங்கள் நாடு மிகப்பெரிய ஜனநாயக நாடு. சகிப்புத்தன்மை மற்றும் நீண்ட கால அர்பணிப்பு கொண்ட பன்மைத் துவ மக்கள் வாழ்கிறார்கள். இந்திய அரசியலமைப்பு சிறுபான்மை மக்கள் உட்பட அனைத்து குடிமக்களுக்கும் அடிப்படை உரிமைகளை உறுதி செய்கிறது. மேலும் மத சுதந்திரத்தை பாதுகாக்கிறது. ஜனநாயக நிர்வாகம் அடிப்படை உரிமைகளை மேலும் பாதுகாக்கும். எந்த ஒரு வெளிநாட்டு அரசும், நிறுவனமும் எங்கள் நாட்டு மக்களின் உரிமைகளை பாதுகாக்கிறோம் என கூறவேண்டிய அவசியம் இல்லை. மத சுந்திரம் குறித்து கேள்வி எழுப்ப வேண்டிய தேவையும் இல்லை. இந்தியாவின் உள்நாட்டு விவாகரங்களில் அமெரிக்கா தலையிட வேண்டாம்’’ என்று எச்சரித்துள்ளார்.